yahi aksar auqat hum dekhte hain

yahī aksar auqāt ham dekhte haiñ

hamārī taraf aap kam dekhte haiñ

tirī zulf ke pech-o-ḳham dekhte haiñ

ki dar haa.e dair-o-haram dekhte haiñ

ḳhudā kī qasam kyā nahīñ dekhte ham

tumheñ jab ḳhudā kī qasam dekhte haiñ

dikhātī hai kyā kyā karishme mohabbat

ye āb-e-baqā hai ki sam dekhte haiñ

sitam bar sitam zindagī ke muhāfiz

sitamgar ko vaqf-e-sitam dekhte haiñ

agar ham bahut kam-nazar haiñ to kyā hai

kuchh ahl-e-nazar bhī to kam dekhte haiñ

hamāre ḳhudā haiñ magar aap kab tak

raheñge sanam ke sanam dekhte haiñ

ḳhudārā na pūchho na pūchho ḳhudārā

jo ham dekhte the jo ham dekhte haiñ

nazar aa.e aa.e na aa.e na aa.e

navishte meñ kyā hai raqam dekhte haiñ

kisī ke mahāsin kisī ke ma.ā.ib

ye tum dekhte ho vo ham dekhte haiñ

ka.ī dekhne vaale aise bhī haiñ jo

ḳhushī dekhte haiñ na ġham dekhte haiñ

kab aa.egā din jab ġharīboñ kī jānib

uTheñge tumhāre qadam dekhte haiñ

maiñ un mutriboñ kī taraf dekhtā huuñ

jo sur dekhte haiñ na sam dekhte haiñ

nahīñ dekhte aañkh uThā kar ġhalat hai

nahīñ vā.iz-e-mohtaram dekhte haiñ

jinheñ naaz hai quvvat-e-bāsira par

vahī log 'sarshār' kam dekhte haiñ

yahi aksar auqat hum dekhte hain

hamari taraf aap kam dekhte hain

teri zulf ke pech-o-KHam dekhte hain

ki dar hae dair-o-haram dekhte hain

KHuda ki qasam kya nahin dekhte hum

tumhein jab KHuda ki qasam dekhte hain

dikhati hai kya kya karishme mohabbat

ye aab-e-baqa hai ki sam dekhte hain

sitam bar sitam zindagi ke muhafiz

sitamgar ko waqf-e-sitam dekhte hain

agar hum bahut kam-nazar hain to kya hai

kuchh ahl-e-nazar bhi to kam dekhte hain

hamare KHuda hain magar aap kab tak

rahenge sanam ke sanam dekhte hain

KHudara na puchho na puchho KHudara

jo hum dekhte the jo hum dekhte hain

nazar aae aae na aae na aae

nawishte mein kya hai raqam dekhte hain

kisi ke mahasin kisi ke maaib

ye tum dekhte ho wo hum dekhte hain

kai dekhne wale aise bhi hain jo

KHushi dekhte hain na gham dekhte hain

kab aaega din jab gharibon ki jaanib

uThenge tumhaare qadam dekhte hain

main un mutribon ki taraf dekhta hun

jo sur dekhte hain na sam dekhte hain

nahin dekhte aankh uTha kar ghalat hai

nahin waiz-e-mohtaram dekhte hain

jinhen naz hai quwwat-e-basira par

wahi log 'sarshaar' kam dekhte hain