yahi chaman tha yahi gul yahi kali pahle

yahī chaman thā yahī gul yahī kalī pahle

tire baġhair magar thī na dilkashī pahle

dayār-e-ishq meñ ham tum the ajnabī pahle

kisī ko ham se shikāyat na thī kabhī pahle

chale haiñ aap jalāne zamāne bhar ke charāġh

ḳhud apne ghar meñ to kar liije raushnī pahle

ham aaj us kā tasavvur bhī kar nahīñ sakte

guzar ga.ī hai chaman meñ jo zindagī pahle

kalī ko girya-e-shabnam kā raaz thā ma.alūm

har ek shai se chaman meñ vahī hañsī pahle

tumhāre aate hī har-sū charāġh jal uTThe

jahāñ pe varna musallat thī tīrgī pahle

ye sochtā huuñ to uljhan sī dil ko hotī hai

tumhāre husn meñ kitnī thī sādgī pahle

ab apne ġham se hī fursat nahīñ hai ai 'nāshād'

ġham-e-habīb meñ hotī thī shā.erī pahle

yahi chaman tha yahi gul yahi kali pahle

tere baghair magar thi na dilkashi pahle

dayar-e-ishq mein hum tum the ajnabi pahle

kisi ko hum se shikayat na thi kabhi pahle

chale hain aap jalane zamane bhar ke charagh

KHud apne ghar mein to kar lije raushni pahle

hum aaj us ka tasawwur bhi kar nahin sakte

guzar gai hai chaman mein jo zindagi pahle

kali ko girya-e-shabnam ka raaz tha malum

har ek shai se chaman mein wahi hansi pahle

tumhaare aate hi har-su charagh jal uTThe

jahan pe warna musallat thi tirgi pahle

ye sochta hun to uljhan si dil ko hoti hai

tumhaare husn mein kitni thi sadgi pahle

ab apne gham se hi fursat nahin hai ai 'nashad'

gham-e-habib mein hoti thi shaeri pahle