yahi hai ishq ka anjam shahr mein tere

yahī hai 'ishq kā anjām shahr meñ tere

ki ho gayā huuñ maiñ badnām shahr meñ tere

tire firāq meñ likkhī thī jo ġhazal maiñ ne

huī hai aaj vo nīlām shahr meñ tere

guzar gayā hai mirā din ḳhudā ḳhudā kar ke

kaTegī kaise mirī shaam shahr meñ tere

chhupā liye tire dāman ke daaġh aur dhabbe

lagā ke apne pe ilzām shahr meñ tere

hamārī duniyā meñ din bhī hai raat kī mānind

ki chāñd niklā sar-e-shām shahr meñ tere

misāl-e-ā.ina raushan huuñ saarī duniyā meñ

na aayā phir bhī kisī kaam shahr meñ tere

adab kī bazm meñ gumnām to nahīñ 'afsar'

sunā hai sab ne mirā naam shahr meñ tere

yahi hai 'ishq ka anjam shahr mein tere

ki ho gaya hun main badnam shahr mein tere

tere firaq mein likkhi thi jo ghazal main ne

hui hai aaj wo nilam shahr mein tere

guzar gaya hai mera din KHuda KHuda kar ke

kaTegi kaise meri sham shahr mein tere

chhupa liye tere daman ke dagh aur dhabbe

laga ke apne pe ilzam shahr mein tere

hamari duniya mein din bhi hai raat ki manind

ki chand nikla sar-e-sham shahr mein tere

misal-e-aina raushan hun sari duniya mein

na aaya phir bhi kisi kaam shahr mein tere

adab ki bazm mein gumnam to nahin 'afsar'

suna hai sab ne mera nam shahr mein tere