yahi hai unki nazakat to haal kya hoga

yahī hai un kī nazākat to haal kyā hogā

mujhe ye Dar hai ki vaqt-e-visāl kyā hogā

kisī kā sabza-e-turbat na ho sakā pāmāl

ḳhirām-e-nāz se dil pā.emāl kyā hogā

lahad par aane lagā kyuuñ pas-e-fanā koī

miTe huoñ kā kisī ko ḳhayāl kyā hogā

vo sin hī kyā hai samajh ho jo aisī bātoñ kī

vo pūchhte haiñ ki roz-e-visāl kyā hogā

na dil rahā na tabī.at rahī vo pahlī sī

kisī kī baat kā ham ko malāl kyā hogā

kanār-e-shauq meñ kyuuñ aa.ine kī ḳhvāhish hai

vo baat hī nahīñ chehra niDhāl kyā hogā

ajal ḳhudā ke liye rahm kar hasīnoñ par

milā ke ḳhaak meñ husn-o-jamāl kyā hogā

mirī ḳhushī kī unheñ kis liye ḳhushī hogī

mire malāl kā un ko malāl kyā hogā

batā.eñ kyā tumheñ kyuuñ kar gale lagā.eñge

batā.eñ kyā tumheñ roz-e-visāl kyā hogā

sharāb piine kī aadat hai mujh ko chullū se

mujhe milā bhī to jām-e-sifāl kyā hogā

'riyāz' umr to guzrī siyāhkārī meñ

ḳhabar nahīñ ki hamārā ma.aal kyā hogā

yahi hai un ki nazakat to haal kya hoga

mujhe ye Dar hai ki waqt-e-visal kya hoga

kisi ka sabza-e-turbat na ho saka pamal

KHiram-e-naz se dil paemal kya hoga

lahad par aane laga kyun pas-e-fana koi

miTe huon ka kisi ko KHayal kya hoga

wo sin hi kya hai samajh ho jo aisi baaton ki

wo puchhte hain ki roz-e-visal kya hoga

na dil raha na tabiat rahi wo pahli si

kisi ki baat ka hum ko malal kya hoga

kanar-e-shauq mein kyun aaine ki KHwahish hai

wo baat hi nahin chehra niDhaal kya hoga

ajal KHuda ke liye rahm kar hasinon par

mila ke KHak mein husn-o-jamal kya hoga

meri KHushi ki unhen kis liye KHushi hogi

mere malal ka un ko malal kya hoga

bataen kya tumhein kyun kar gale lagaenge

bataen kya tumhein roz-e-visal kya hoga

sharab pine ki aadat hai mujh ko chullu se

mujhe mila bhi to jam-e-sifal kya hoga

'riyaz' umr to guzri siyahkari mein

KHabar nahin ki hamara maal kya hoga