yahi hum ko guman aksar rahe hain

yahī ham ko gumāñ aksar rahe haiñ

hamāre naam vo jaañ kar rahe haiñ

abhī hai daur-e-āġhāz-e-mohabbat

vo merā dil dukhāte Dar rahe haiñ

vafā un kī tabī.at meñ nahīñ hai

vo koshish to yaqīnan kar rahe haiñ

qazā kā ḳhauf hai logoñ ko lekin

ham apnī zindagī se Dar rahe haiñ

vahī bhaTke hue haiñ rāste se

ba-zāt-e-ḳhud jo ik rahbar rahe haiñ

jo apne aap se bhī ḳhush nahīñ haiñ

ḳhafā mujh se vahī aksar rahe haiñ

mirī rusvā.ī ho jaa.e na zinda

vo merā naam le kar mar rahe haiñ

kareñge shā.erī bhī agle dam par

abhī to ham mohabbat kar rahe haiñ

'shikhā' maiñ mīThe paanī kī nadī huuñ

mujhe kyoñ log khārā kar rahe haiñ

yahi hum ko guman aksar rahe hain

hamare nam wo jaan kar rahe hain

abhi hai daur-e-aghaz-e-mohabbat

wo mera dil dukhate Dar rahe hain

wafa un ki tabiat mein nahin hai

wo koshish to yaqinan kar rahe hain

qaza ka KHauf hai logon ko lekin

hum apni zindagi se Dar rahe hain

wahi bhaTke hue hain raste se

ba-zat-e-KHud jo ek rahbar rahe hain

jo apne aap se bhi KHush nahin hain

KHafa mujh se wahi aksar rahe hain

meri ruswai ho jae na zinda

wo mera nam le kar mar rahe hain

karenge shaeri bhi agle dam par

abhi to hum mohabbat kar rahe hain

'shikha' main miThe pani ki nadi hun

mujhe kyon log khaara kar rahe hain