yahi haqir si duniya jo KHak-dan lage

yahī haqīr sī duniyā jo ḳhāk-dān lage

bulandiyoñ se jo dekho to āsmān lage

vo zindagī kī kaḌī dhuup sah nahīñ saktā

hai ek abr kā TukḌā bhī sā.ebān lage

use bhī jiine kā haq hai use bhī jiine do

jo be-zabān nahīñ aur be-zabān lage

batāo nazr karūñ maiñ kise matā-e-hayāt

maiñ jis ko pyaar karūñ vo bhī bad-gumān lage

usī ko sauñp de sarmāya-e-hunar apnā

matā-e-lauh-o-qalam kā jo pāsbān lage

ravāñ-davāñ thā jahāñ ābshār-e-naġhma-o-nūr

vo shahr-e-aish-o-tarab kitnā be-amān lage

ye apne zauq-e-tajassus kī baat hai varna

vo be-surāġh lage hai na be-nishān lage

vo baat nok-e-qalam tak zarūr aa.egī

jo harf harf haqīqat kī tarjumān lage

ḳhamoshiyoñ meñ bhī sargoshiyoñ ke haiñ ambār

tirī nigāh mire ġham kī dāstān lage

hazār saal masarrat kī zindagī bhī 'asar'

na ek lamha na ik pal na ek aan lage

yahi haqir si duniya jo KHak-dan lage

bulandiyon se jo dekho to aasman lage

wo zindagi ki kaDi dhup sah nahin sakta

hai ek abr ka TukDa bhi saeban lage

use bhi jine ka haq hai use bhi jine do

jo be-zaban nahin aur be-zaban lage

batao nazr karun main kise mata-e-hayat

main jis ko pyar karun wo bhi bad-guman lage

usi ko saunp de sarmaya-e-hunar apna

mata-e-lauh-o-qalam ka jo pasban lage

rawan-dawan tha jahan aabshaar-e-naghma-o-nur

wo shahr-e-aish-o-tarab kitna be-aman lage

ye apne zauq-e-tajassus ki baat hai warna

wo be-suragh lage hai na be-nishan lage

wo baat nok-e-qalam tak zarur aaegi

jo harf harf haqiqat ki tarjuman lage

KHamoshiyon mein bhi sargoshiyon ke hain ambar

teri nigah mere gham ki dastan lage

hazar sal masarrat ki zindagi bhi 'asar'

na ek lamha na ek pal na ek aan lage