yahi hua hai jo us rahguzar se guzre hain

yahī huā hai jo us rahguzar se guzre haiñ

hazār hashr ke manzar nazar se guzre haiñ

vo rāheñ aaj bhī naqsh-e-vafā se haiñ raushan

mizāj-dān-e-mohabbat jidhar se guzre haiñ

ḳhudā kare na vo guzreñ kisī kī nazroñ se

jo sail-e-dard-o-balā mere sar se guzre haiñ

chhupā.e āñkhoñ meñ aañsū diloñ meñ dard-o-fuġhāñ

vafā shanās yūñhī tere dar se guzre haiñ

talāsh-e-yār meñ ham kyā Dareñ musībat se

hazār baar rah-e-pur-ḳhatar se guzre haiñ

khilā ga.e haiñ mohabbat ke phuul kāñToñ meñ

tumhāre chāhne vaale jidhar se guzre haiñ

dil-o-jigar meñ ujālā hai aaj tak jin kā

kuchh aise jalve bhī 'kashfī' nazar se guzre haiñ

yahi hua hai jo us rahguzar se guzre hain

hazar hashr ke manzar nazar se guzre hain

wo rahen aaj bhi naqsh-e-wafa se hain raushan

mizaj-dan-e-mohabbat jidhar se guzre hain

KHuda kare na wo guzren kisi ki nazron se

jo sail-e-dard-o-bala mere sar se guzre hain

chhupae aankhon mein aansu dilon mein dard-o-fughan

wafa shanas yunhi tere dar se guzre hain

talash-e-yar mein hum kya Daren musibat se

hazar bar rah-e-pur-KHatar se guzre hain

khila gae hain mohabbat ke phul kanTon mein

tumhaare chahne wale jidhar se guzre hain

dil-o-jigar mein ujala hai aaj tak jin ka

kuchh aise jalwe bhi 'kashfi' nazar se guzre hain