yahi kafi tha tawajjoh ko haTane ke liye

yahī kaafī thā tavajjoh ko haTāne ke liye

zaḳhm hote the mire paas dikhāne ke liye

jhuknā paḌtā hai mujhe zaḳhm khujāne ke liye

itnī zanjīr kahāñ paañv uThāne ke liye

log samjhe haiñ mohabbat ko liye baiThā huuñ

hādse aur bhī hote haiñ sunāne ke liye

muntazir ghar meñ mire koī nahīñ hotā thā

der kartā thā faqat der se aane ke liye

koī tehvār mire vāste tehvār nahīñ

ik tirā hijr hī kaafī hai manāne ke liye

bhuul jā dost mire apnī mohabbat de kar

qarz letā hai yahāñ kaun chukāne ke liye

kiil tasvīr hathauḌī ko liye phirtā huuñ

koī dīvār nahīñ miltī lagāne ke liye

ek lamhe meñ mire bojh ke nīche aa kar

saañs niklā hai mirā jaan chhuḌāne ke liye

rabt TuuTā thā mirī aañkh ke khulte hī 'uzair'

phir na.e ḳhvāb meñ utrā thā purāne ke liye

yahi kafi tha tawajjoh ko haTane ke liye

zaKHm hote the mere pas dikhane ke liye

jhukna paDta hai mujhe zaKHm khujaane ke liye

itni zanjir kahan panw uThane ke liye

log samjhe hain mohabbat ko liye baiTha hun

hadse aur bhi hote hain sunane ke liye

muntazir ghar mein mere koi nahin hota tha

der karta tha faqat der se aane ke liye

koi tehwar mere waste tehwar nahin

ek tera hijr hi kafi hai manane ke liye

bhul ja dost mere apni mohabbat de kar

qarz leta hai yahan kaun chukane ke liye

kil taswir hathauDi ko liye phirta hun

koi diwar nahin milti lagane ke liye

ek lamhe mein mere bojh ke niche aa kar

sans nikla hai mera jaan chhuDane ke liye

rabt TuTa tha meri aankh ke khulte hi 'uzair'

phir nae KHwab mein utra tha purane ke liye