yahi karan judai ka bana tha

yahī kāran judā.ī kā banā thā

mujhe vo vaqt se pahle milā thā

usī ne zaḳhm bhī itne diye the

jise maiñ jis qadar achchhā lagā thā

mirī maañ dukh meñ mujh ko dekhtī thī

maiñ chhoTā thā magar sab se baḌā thā

udāsī mere pīchhe paḌ ga.ī thī

mirā dil thā yā koī ġham-sarā thā

savāl-e-‘ishq par bole ki haañ hai

jo pūchhā mujh se bas itnā kahā thā

bhañvar se āḳhirī siskī ye ubhrī

hamārā nāḳhudā thā bā-ḳhudā thā

jise sab ‘aql-e-kul samjhe hue the

usī kī 'aql par parda paḌā thā

jahāñ par thak ke maiñ baiThā huā thā

vahāñ se rāstā chalne lagā thā

nahīñ thā vaqt lekin terī ḳhātir

mujhe har shaḳhs se milnā paḌā thā

vo āñkheñ mujh ko ghūre jā rahī thiiñ

maiñ un ko dekh ke sahmā huā thā

mohabbat kā nahīñ hai 'ilm lekin

maiñ un hāthoñ ko aksar chūmtā thā

vo miltā ḳhud-kushī karne se pahle

maiñ us ko baḳhsh denā chāhtā thā

kahīñ par shādiyāne baj rahe the

kisī kā dukh ziyāda ho gayā thā

vo peshānī mujhe achchhī lagī thī

maiñ un hoñToñ kā girvīda huā thā

javāñ beTe ke aañsū poñchhtā thā

vo būḌhā baap jo saThiyā gayā thā

zamīñ paañv paḌī thī varna 'haidar'

mire sar se falak tak rāstā thā

yahi karan judai ka bana tha

mujhe wo waqt se pahle mila tha

usi ne zaKHm bhi itne diye the

jise main jis qadar achchha laga tha

meri man dukh mein mujh ko dekhti thi

main chhoTa tha magar sab se baDa tha

udasi mere pichhe paD gai thi

mera dil tha ya koi gham-sara tha

sawal-e-‘ishq par bole ki han hai

jo puchha mujh se bas itna kaha tha

bhanwar se aaKHiri siski ye ubhri

hamara naKHuda tha ba-KHuda tha

jise sab ‘aql-e-kul samjhe hue the

usi ki 'aql par parda paDa tha

jahan par thak ke main baiTha hua tha

wahan se rasta chalne laga tha

nahin tha waqt lekin teri KHatir

mujhe har shaKHs se milna paDa tha

wo aankhen mujh ko ghure ja rahi thin

main un ko dekh ke sahma hua tha

mohabbat ka nahin hai 'ilm lekin

main un hathon ko aksar chumta tha

wo milta KHud-kushi karne se pahle

main us ko baKHsh dena chahta tha

kahin par shadiyane baj rahe the

kisi ka dukh ziyaada ho gaya tha

wo peshani mujhe achchhi lagi thi

main un honTon ka girwida hua tha

jawan beTe ke aansu ponchhta tha

wo buDha bap jo saThiya gaya tha

zamin panw paDi thi warna 'haidar'

mere sar se falak tak rasta tha