yahi kahenge sabhi ghar ko ghar samajhte hain

yahī kaheñge sabhī ghar ko ghar samajhte haiñ

ye jhuuT vo hai jise bām-o-dar samajhte haiñ

basā basāyā koī is taraf to aatā nahīñ

jo lā-makāñ haiñ vahī dil ko ghar samajhte haiñ

maiñ aise dasht-navardoñ ko saath rakhtā huuñ

kitāb paḌh ke jo apnā safar samajhte haiñ

ye āsmān unhīñ sar-phiroñ se sar hogā

tasavvurāt ko jo bāl-o-par samajhte haiñ

jo nā-samajh haiñ uThāte haiñ zindagī ke maze

samajhne vaale to bas 'umr-bhar samajhte haiñ

shajar shajar se maiñ letā huuñ mashvara har gaam

vo chal na paa.eñ magar rah-guzar samajhte haiñ

'amit-bajāj' koī Dar ko jiit paayā kyā

vo kāmyāb haiñ jo apnā Dar samajhte haiñ

yahi kahenge sabhi ghar ko ghar samajhte hain

ye jhuT wo hai jise baam-o-dar samajhte hain

basa basaya koi is taraf to aata nahin

jo la-makan hain wahi dil ko ghar samajhte hain

main aise dasht-nawardon ko sath rakhta hun

kitab paDh ke jo apna safar samajhte hain

ye aasman unhin sar-phiron se sar hoga

tasawwuraat ko jo baal-o-par samajhte hain

jo na-samajh hain uThate hain zindagi ke maze

samajhne wale to bas 'umr-bhar samajhte hain

shajar shajar se main leta hun mashwara har gam

wo chal na paen magar rah-guzar samajhte hain

'amit-bajaj' koi Dar ko jit paya kya

wo kaamyab hain jo apna Dar samajhte hain