yahi miras mein hain milne wale

yahī mīrās meñ haiñ milne vaale

ye ḳhālī ghar haiñ ye un ke qabāle

zarā sā ḳhat unheñ likhnā hai mushkil

bahut se likh diye hoñge maqāle

vo dīvāne vo pyāse ab kahāñ haiñ

garebāñ chaak the paañv meñ chhāle

luTā kar daulat-e-duniyā kisī par

kahā mujh se “ye ġham haiñ to uThā le''

nahīñ hai ham-zabāñ bachchoñ meñ koī

kutub ḳhāna karūñ kis ke havāle

bhalā ye log kyoñ māreñge patthar

ye sab chehre haiñ mere dekhe bhāle

kisī din bech Dāleñge himāla

ye mere rahnumā rahbar jiyāle

karam bhī yaad kar apnoñ ke 'ashraf'

gile shikvoñ ko hoñToñ meñ dabā le

yahi miras mein hain milne wale

ye KHali ghar hain ye un ke qabaale

zara sa KHat unhen likhna hai mushkil

bahut se likh diye honge maqale

wo diwane wo pyase ab kahan hain

gareban chaak the panw mein chhaale

luTa kar daulat-e-duniya kisi par

kaha mujh se “ye gham hain to uTha le

nahin hai ham-zaban bachchon mein koi

kutub KHana karun kis ke hawale

bhala ye log kyon marenge patthar

ye sab chehre hain mere dekhe bhaale

kisi din bech Dalenge himala

ye mere rahnuma rahbar jiyale

karam bhi yaad kar apnon ke 'ashraf'

gile shikwon ko honTon mein daba le