yahi raha justuju ka aalam to jaan-e-alam ko pa hi lenge

yahī rahā justujū kā aalam to jān-e-ālam ko pā hī leñge

agar irādoñ ne dam na toḌā savād-e-manzil ko jā hī leñge

hameñ ye mohlat kahāñ ki socheñ gunāh kyā hai savāb kyā hai

vo apnī shān-e-karam ke sadqe gire huoñ ko uThā hī leñge

hisār-e-āvārgī se nikle agar shu.ūr-e-nazar hamārā

unheñ ḳhayāloñ meñ jā hī leñge unheñ tasavvur meñ pā hī leñge

adā-e-rangīñ kī dilkashī se nigāheñ mānūs ho rahī haiñ

nazar farebī ke aa.ine meñ vo naqsh apnā jamā hī leñge

hazār māhaul ajnabī ho hazār pābandiyāñ hoñ lekin

zabān rakhtī hai ḳhāmushī bhī ham apnā qissa sunā hī leñge

'rishī' talāsh-o-talab meñ ham ko ḳhud-e'timādī pe hausla hai

nazar nazar un ko pā hī leñge qadam qadam un ko jā hī leñge

yahi raha justuju ka aalam to jaan-e-alam ko pa hi lenge

agar iradon ne dam na toDa sawad-e-manzil ko ja hi lenge

hamein ye mohlat kahan ki sochen gunah kya hai sawab kya hai

wo apni shan-e-karam ke sadqe gire huon ko uTha hi lenge

hisar-e-awargi se nikle agar shuur-e-nazar hamara

unhen KHayalon mein ja hi lenge unhen tasawwur mein pa hi lenge

ada-e-rangin ki dilkashi se nigahen manus ho rahi hain

nazar farebi ke aaine mein wo naqsh apna jama hi lenge

hazar mahaul ajnabi ho hazar pabandiyan hon lekin

zaban rakhti hai KHamushi bhi hum apna qissa suna hi lenge

'rishi' talash-o-talab mein hum ko KHud-e'timadi pe hausla hai

nazar nazar un ko pa hi lenge qadam qadam un ko ja hi lenge