yahi safar ki tamanna yahi thakan ki pukar

yahī safar kī tamannā yahī thakan kī pukār

khaḌe hue haiñ bahut duur tak ghane ashjār

nahīñ ye fikr ki sar phoḌne kahāñ jaa.eñ

bahut buland hai apne vajūd kī dīvār

darāz-qad ba-adā-e-ḳhirām kyā kahnā

tamām ahl-e-jahāñ ke liye hai dars-e-vaqār

ye daur vo hai ki sab nīm-jāñ nazar aa.e

ki raqs meñ hai anāḌī ke haath meñ talvār

badaltī rut hai rag-e-sabza meñ numū kam kam

kalī kalī pe tirā naam likh rahī hai bahār

shikasta but haiñ jabīñ zaḳhm zaḳhm but-gar kī

sirhāne tesha ke larzīda hai koī jhankār

dikhā.ī de to vo bas ḳhvāb meñ dikhā.ī de

mirā ye haal ki maiñ muddatoñ se huuñ bedār

vo log jo tujhe har roz dekhte hoñge

unheñ ḳhabar nahīñ kyā shai hai hasrat-e-dīdār

ze-farq-tā-ba-qadam rūp-rañg kī jhankār

tamām mehr-o-mohabbat tamām bos-o-kanār

tarah tarah se koī naam 'shāz' likhtā thā

hatheliyoñ pe hinā.ī hurūf the gul-kār

yahi safar ki tamanna yahi thakan ki pukar

khaDe hue hain bahut dur tak ghane ashjar

nahin ye fikr ki sar phoDne kahan jaen

bahut buland hai apne wajud ki diwar

daraaz-qad ba-ada-e-KHiram kya kahna

tamam ahl-e-jahan ke liye hai dars-e-waqar

ye daur wo hai ki sab nim-jaan nazar aae

ki raqs mein hai anaDi ke hath mein talwar

badalti rut hai rag-e-sabza mein numu kam kam

kali kali pe tera nam likh rahi hai bahaar

shikasta but hain jabin zaKHm zaKHm but-gar ki

sirhane tesha ke larzida hai koi jhankar

dikhai de to wo bas KHwab mein dikhai de

mera ye haal ki main muddaton se hun bedar

wo log jo tujhe har roz dekhte honge

unhen KHabar nahin kya shai hai hasrat-e-didar

ze-farq-ta-ba-qadam rup-rang ki jhankar

tamam mehr-o-mohabbat tamam bos-o-kanar

tarah tarah se koi nam 'shaz' likhta tha

hatheliyon pe hinai huruf the gul-kar