yahi samjha hun bas itni hui hai aagahi mujhko

yahī samjhā huuñ bas itnī huī hai āgahī mujh ko

na raas aa.egī shāyad zindagī-bhar zindagī mujh ko

milā ranj-o-alam meñ bhī surūr-e-zindagī mujh ko

nazar aatī hai aksar tīrgī meñ raushnī mujh ko

na ab ehsās-e-ranj-o-ġham na ehsās-e-ḳhushī mujh ko

ye kis markaz pe le aa.ī mirī dīvāngī mujh ko

chhalak aa.e haiñ aañsū jab bhī aa.ī hai hañsī mujh ko

sunātī hī rahī paiġhām-e-ġham merī ḳhushī mujh ko

na denā thā agar kuchh iḳhtiyār-e-zindagī mujh ko

to kyuuñ ai ḳhāliq-e-ālam banāyā aadmī mujh ko

siyah-baḳhtī huī hai saya-afgan is qadar mujh par

nazar aatī hai har-sū tīrgī hī tīrgī mujh ko

'jalīs' ehsān kyā kam hai ye merī bad-nasībī kā

tamīz apne parā.e kī to āḳhir ho ga.ī mujh ko

yahi samjha hun bas itni hui hai aagahi mujh ko

na ras aaegi shayad zindagi-bhar zindagi mujh ko

mila ranj-o-alam mein bhi surur-e-zindagi mujh ko

nazar aati hai aksar tirgi mein raushni mujh ko

na ab ehsas-e-ranj-o-gham na ehsas-e-KHushi mujh ko

ye kis markaz pe le aai meri diwangi mujh ko

chhalak aae hain aansu jab bhi aai hai hansi mujh ko

sunati hi rahi paigham-e-gham meri KHushi mujh ko

na dena tha agar kuchh iKHtiyar-e-zindagi mujh ko

to kyun ai KHaliq-e-alam banaya aadmi mujh ko

siyah-baKHti hui hai saya-afgan is qadar mujh par

nazar aati hai har-su tirgi hi tirgi mujh ko

'jalis' ehsan kya kam hai ye meri bad-nasibi ka

tamiz apne parae ki to aaKHir ho gai mujh ko