yahi tamanna-e-dil hai unki jidhar ko ruKH ho udhar ko chaliye

yahī tamanna-e-dil hai un kī jidhar ko ruḳh ho udhar ko chaliye

huā hai go ishtiyāq behad jamā ke pā-e-nazar ko chaliye

hue haiñ mahrūm-e-dīd-e-be-dil kiyā tajāhul kā us ne bismil

vo dil-rubā ban gayā hai qātil kamar ko kas ke safar ko chaliye

ġharaz thī iz.hār-e-mudda.ā se sitam ko kiyā ho ga.e jo shākī

vo dekhte hī bigaḌ na jaa.eñ bulāne ab nāma-bar ko chaliye

banā hai dam-sāz kaun un kā pata nahīñ muddatoñ se lagtā

ye raaz ho jaa.e āshkārā kahīñ se lene ḳhabar ko chaliye

agar hai shauq-e-jamāl-e-jānāñ nahīñ hai kuchh pās-e-vaz.a-e-mauzūñ

shikoh-e-tamkīñ vidā.a kiije manāne us ishva-gar ko chaliye

shahīd hai 'sāqī'-e-duā-go kashīda kyuuñ is qadar hue ho

kabhī to ai yaar dekhne ko zarā qatīl-e-nazar ko chaliye

yahi tamanna-e-dil hai un ki jidhar ko ruKH ho udhar ko chaliye

hua hai go ishtiyaq behad jama ke pa-e-nazar ko chaliye

hue hain mahrum-e-did-e-be-dil kiya tajahul ka us ne bismil

wo dil-ruba ban gaya hai qatil kamar ko kas ke safar ko chaliye

gharaz thi izhaar-e-muddaa se sitam ko kiya ho gae jo shaki

wo dekhte hi bigaD na jaen bulane ab nama-bar ko chaliye

bana hai dam-saz kaun un ka pata nahin muddaton se lagta

ye raaz ho jae aashkara kahin se lene KHabar ko chaliye

agar hai shauq-e-jamal-e-jaanan nahin hai kuchh pas-e-waza-e-mauzun

shikoh-e-tamkin widaa kije manane us ishwa-gar ko chaliye

shahid hai 'saqi'-e-dua-go kashida kyun is qadar hue ho

kabhi to ai yar dekhne ko zara qatil-e-nazar ko chaliye