yahi to masala Thahra ki aab-o-gil nahin milte

yahī to mas.ala Thahrā ki āb-o-gil nahīñ milte

yahāñ bas haath milte haiñ ki dil se dil nahīñ milte

takalluf bartaraf rakh kar jo tanhā.ī meñ milte haiñ

ḳhudā jaane vo kyuuñ āḳhir sar-e-mahfil nahīñ milte

salāmat haiñ ḳhudā ke fazl se ham aisī duniyā meñ

jahāñ lāsheñ to miltī haiñ magar qātil nahīñ milte

jahāñ ke zarre zarre se sadā-e-adl aatī thī

usī insāf ke mandir meñ ab aadil nahīñ milte

ham aisī kashtī-e-be-bādbānī ke musāfir haiñ

jise tūfāñ to milte haiñ magar sāhil nahīñ milte

chaḌhā rakhā hai ġhāza jab se apne apne chehroñ par

nazar aate haiñ ahl-e-haq sabhī bātil nahīñ milte

ai 'tashna' nā-ummīdī kufr hai so justujū kar leñ

agarche ahmaqoñ ke shahr meñ aaqil nahīñ milte

yahi to masala Thahra ki aab-o-gil nahin milte

yahan bas hath milte hain ki dil se dil nahin milte

takalluf bartaraf rakh kar jo tanhai mein milte hain

KHuda jaane wo kyun aaKHir sar-e-mahfil nahin milte

salamat hain KHuda ke fazl se hum aisi duniya mein

jahan lashen to milti hain magar qatil nahin milte

jahan ke zarre zarre se sada-e-adl aati thi

usi insaf ke mandir mein ab aadil nahin milte

hum aisi kashti-e-be-baadbani ke musafir hain

jise tufan to milte hain magar sahil nahin milte

chaDha rakha hai ghaza jab se apne apne chehron par

nazar aate hain ahl-e-haq sabhi baatil nahin milte

ai 'tashna' na-ummidi kufr hai so justuju kar len

agarche ahmaqon ke shahr mein aaqil nahin milte