yakta-e-rozgar nahin fikr-o-fan mein hum

yaktā-e-rozgār nahīñ fikr-o-fan meñ ham

ye kam nahīñ ki baiThe haiñ ahl-e-suḳhan meñ ham

taz.īn-e-kā.enāt hī hai maqsad-e-hayāt

shabnam jo haiñ chaman meñ to anjum gagan meñ ham

ġhurbat ne kī hai is tarah taz.īn-e-zindagī

lagte haiñ shāhkār har ik pairahan meñ ham

tauba na yaad aa.ī gunāhoñ kī bhiiḌ meñ

ab muñh chhupā.e jaate haiñ dekho kafan meñ ham

āsūda-e-hayāt rahe jis kī god meñ

dafnā.e jā.eñge isī ḳhāk-e-vatan meñ ham

tasḳhīr-e-kā.enāt meñ masrūf hai jahāñ

uljhe hue haiñ aaj bhī rasm-e-kuhan meñ ham

khāte raheñge yūñhī zamāne kī Thokareñ

āvāra-e-nifāq haiñ jab tak vatan meñ ham

taslīm ḳhush-libāsī meñ guzrī hai zindagī

kitne hasīn lagte haiñ lekin kafan meñ ham

kartī hai rashk gardish-e-daurāñ bhī aaj tak

is tarah shādmāñ rahe ranj-o-mehan meñ ham

be-sāḳhta chhalak paḌī hai chashm-e-iltifāt

yuuñ sangsār-e-ġham rahe haiñ anjuman meñ ham

jaur-o-sitam ko had se guzar jaane do 'tarab'

haq kā nisāb lā.eñge apne vatan meñ ham

yakta-e-rozgar nahin fikr-o-fan mein hum

ye kam nahin ki baiThe hain ahl-e-suKHan mein hum

tazin-e-kaenat hi hai maqsad-e-hayat

shabnam jo hain chaman mein to anjum gagan mein hum

ghurbat ne ki hai is tarah tazin-e-zindagi

lagte hain shahkar har ek pairahan mein hum

tauba na yaad aai gunahon ki bhiD mein

ab munh chhupae jate hain dekho kafan mein hum

aasuda-e-hayat rahe jis ki god mein

dafnae jaenge isi KHak-e-watan mein hum

tasKHir-e-kaenat mein masruf hai jahan

uljhe hue hain aaj bhi rasm-e-kuhan mein hum

khate rahenge yunhi zamane ki Thokaren

aawara-e-nifaq hain jab tak watan mein hum

taslim KHush-libasi mein guzri hai zindagi

kitne hasin lagte hain lekin kafan mein hum

karti hai rashk gardish-e-dauran bhi aaj tak

is tarah shadman rahe ranj-o-mehan mein hum

be-saKHta chhalak paDi hai chashm-e-iltifat

yun sangsar-e-gham rahe hain anjuman mein hum

jaur-o-sitam ko had se guzar jaane do 'tarab'

haq ka nisab laenge apne watan mein hum