yaqin-e-husn liye rang-e-etibar liye

yaqīn-e-husn liye rañg-e-e'tibār liye

ḳhizāñ ne aaj bahāroñ ke ruup dhaar liye

hayāt jin ke tasavvur se kaañp uThtī hai

na jaane ham ne vo din kis tarah guzār liye

tire baġhair magar zindagī meñ chain kahāñ

agarche gesū-e-hālāt bhī sañvār liye

maqām-e-dār se aage ḳhabar nahīñ kyā hai

pahuñch ga.e haiñ yahāñ tak to un kā pyaar liye

nigāh-e-shauq chaman meñ ho kaise āsūda

har ek phuul hai dāman meñ apne ḳhaar liye

tabāhiyoñ ke sivā kuchh nahīñ mohabbat meñ

ḳhizā.eñ aatī haiñ hamrāh ye bahār liye

kisī kī ek nigāh-e-karam kī hasrat meñ

ḳhud apne dil pe hazāroñ sitam guzār liye

hai un kī bazm haqīqat meñ bazm-e-aish-o-nashāt

vahāñ na jaa.e koī tab.a-e-sogvār liye

na ab bhī jhuum uThe zindagī to kyā kahiye

uThī to hai vo nazar rūh-e-sad-ḳhumār liye

'ḳhalish' kahāñ hai jo dair-o-haram meñ DhūñDte ho

use zamāna huā rāh-e-kū-e-yār liye

yaqin-e-husn liye rang-e-e'tibar liye

KHizan ne aaj bahaaron ke rup dhaar liye

hayat jin ke tasawwur se kanp uThti hai

na jaane hum ne wo din kis tarah guzar liye

tere baghair magar zindagi mein chain kahan

agarche gesu-e-haalat bhi sanwar liye

maqam-e-dar se aage KHabar nahin kya hai

pahunch gae hain yahan tak to un ka pyar liye

nigah-e-shauq chaman mein ho kaise aasuda

har ek phul hai daman mein apne KHar liye

tabahiyon ke siwa kuchh nahin mohabbat mein

KHizaen aati hain hamrah ye bahaar liye

kisi ki ek nigah-e-karam ki hasrat mein

KHud apne dil pe hazaron sitam guzar liye

hai un ki bazm haqiqat mein bazm-e-aish-o-nashat

wahan na jae koi taba-e-sogwar liye

na ab bhi jhum uThe zindagi to kya kahiye

uThi to hai wo nazar ruh-e-sad-KHumar liye

'KHalish' kahan hai jo dair-o-haram mein DhunDte ho

use zamana hua rah-e-ku-e-yar liye