yaqin-e-nur ho dil mein to shab gawara hai

yaqīn-e-nūr ho dil meñ to shab gavārā hai

sahar ne raat ke us paar se pukārā hai

na khaao ḳhauf tilismāt-e-manzar-e-shab se

fareb-e-sho'la-e-zulmat hai jo nazāra hai

bañdhā huā hai nigāhoñ se mehr-e-tābāñ tak

chale chalo ki ye tār-e-nazar sahārā hai

abhī se shikva-e-ayyām-e-rafta che-mā'nī

abhī to raat hamārī hai din hamārā hai

dhaḌak bhī jaa.e to chingāriyāñ sī uThtī haiñ

ye dil nahīñ mire siine meñ sang-e-ḳhārā hai

hujūm-e-kār-e-musalsal ne kar diyā tanhā

mirī kamā.ī munāfa' nahīñ ḳhasāra hai

yaqin-e-nur ho dil mein to shab gawara hai

sahar ne raat ke us par se pukara hai

na khao KHauf tilismat-e-manzar-e-shab se

fareb-e-sho'la-e-zulmat hai jo nazara hai

bandha hua hai nigahon se mehr-e-taban tak

chale chalo ki ye tar-e-nazar sahaara hai

abhi se shikwa-e-ayyam-e-rafta che-ma'ni

abhi to raat hamari hai din hamara hai

dhaDak bhi jae to chingariyan si uThti hain

ye dil nahin mere sine mein sang-e-KHara hai

hujum-e-kar-e-musalsal ne kar diya tanha

meri kamai munafa' nahin KHasara hai