yaqin jis ka hai wo baat bhi guman hi lage

yaqīn jis kā hai vo baat bhī gumāñ hī lage

vo mehrbān hai lekin balā-e-jāñ hī lage

ham itnī martaba guzre haiñ āzmā.ish se

vo sīdhī baat bhī pūchhe to imtihāñ hī lage

taras ga.e haiñ ki khul kar kisī se baat kareñ

har āshnā hameñ ġhairoñ kā rāzdāñ hī lage

ho jaise kaifiyat-e-dil kā aa.ina manzar

vo ham-safar ho to sahrā bhī gulsitāñ hī lage

maiñ jaise markazī kirdār huuñ kahānī kā

koī fasāna ho vo merī dāstāñ hī lage

tire ḳhayāl se nisbat kā ab ye 'ālam hai

kahīñ jhukā.ūñ jabīñ terā āstāñ hī lage

mire vatan ke sabhī log chāñd-tāre haiñ

zamīn us kī mujhe jaise āsmāñ hī lage

'sa.īd' bād-e-samā.at navā-e-mutrib hai

ḳhushī kā giit bhī ab naġhma-e-fuġhāñ hī lage

yaqin jis ka hai wo baat bhi guman hi lage

wo mehrban hai lekin bala-e-jaan hi lage

hum itni martaba guzre hain aazmaish se

wo sidhi baat bhi puchhe to imtihan hi lage

taras gae hain ki khul kar kisi se baat karen

har aashna hamein ghairon ka raazdan hi lage

ho jaise kaifiyat-e-dil ka aaina manzar

wo ham-safar ho to sahra bhi gulsitan hi lage

main jaise markazi kirdar hun kahani ka

koi fasana ho wo meri dastan hi lage

tere KHayal se nisbat ka ab ye 'alam hai

kahin jhukaun jabin tera aastan hi lage

mere watan ke sabhi log chand-tare hain

zamin us ki mujhe jaise aasman hi lage

'said' baad-e-samaat nawa-e-mutrib hai

KHushi ka git bhi ab naghma-e-fughan hi lage