yaqin se bhi gae aur guman se bhi gae

yaqīn se bhī ga.e aur gumān se bhī ga.e

vafūr-e-‘ishq meñ ham tere dhyān se bhī ga.e

chalī ye kaisī havā sāhibān-e-'izz-o-vaqār

zarā sī der lagī apnī shaan se bhī ga.e

kisī tarah se vafā to nibhā dī ham ne magar

hameñ ye dukh hai ki ham apnī jaan se bhī ga.e

rahe zamīñ pe to baaqī parindagī na rahī

uḌe to yuuñ ki phir apnī uḌaan se bhī ga.e

bahut haqīr sahī qadr apne fan kī kareñ

na ye rahā to miyāñ shahd-o-nān se bhī ga.e

ki sāf-goī-o-haq-goī ke junūñ meñ 'doraib'

ham aise log to apnī zabān se bhī ga.e

yaqin se bhi gae aur guman se bhi gae

wafur-e-‘ishq mein hum tere dhyan se bhi gae

chali ye kaisi hawa sahiban-e-'izz-o-waqar

zara si der lagi apni shan se bhi gae

kisi tarah se wafa to nibha di hum ne magar

hamein ye dukh hai ki hum apni jaan se bhi gae

rahe zamin pe to baqi parindagi na rahi

uDe to yun ki phir apni uDan se bhi gae

bahut haqir sahi qadr apne fan ki karen

na ye raha to miyan shahd-o-nan se bhi gae

ki saf-goi-o-haq-goi ke junun mein 'doraib'

hum aise log to apni zaban se bhi gae