yaqin se bhi gae ehtimal se bhi gae

yaqīn se bhī ga.e ehtimāl se bhī ga.e

ham apne 'ahd meñ ḳhvāb-o-ḳhayāl se bhī ga.e

du'ā ke haath kaTe ḳhvāhishoñ ke dil TuuTe

javāb se bhī ga.e ham savāl se bhī ga.e

tamām log ḳhudā-tars hote jaate haiñ

amīr-e-shahr ‘urūj-o-zavāl se bhī ga.e

kise yaqīn dilā.eñ ki ham bhī zinda haiñ

anā ke zaḳhmī ḳhudā indimāl se bhī ga.e

bahut hī mahñgā paḌā un ko shauq-e-ham-safarī

palaT ke aa.e to ḳhud apnī chaal se bhī ga.e

junūñ hai zīnat-e-tahzīb-e-mahfil-e-yārāñ

amīn-e-hosh-o-ḳhirad 'arz-e-hāl se bhī ga.e

hamārā zikr hai dīmak-zada kitāboñ meñ

ham ahl-e-'ilm-o-hunar the misāl se bhī ga.e

badan ko toḌ rahī hai na.ī rutoñ kī thakan

ye karb-e-hijr ke lamhe visāl se bhī ga.e

palaT ke jaane kī himmat muhājiroñ meñ na thī

vatan se bhī ga.e ahl-o-'ayāl se bhī ga.e

hamāre dost saf-e-dushmanāñ meñ shāmil haiñ

ham aise sāda-mizāj apnī Dhaal se bhī ga.e

yaqin se bhi gae ehtimal se bhi gae

hum apne 'ahd mein KHwab-o-KHayal se bhi gae

du'a ke hath kaTe KHwahishon ke dil TuTe

jawab se bhi gae hum sawal se bhi gae

tamam log KHuda-tars hote jate hain

amir-e-shahr ‘uruj-o-zawal se bhi gae

kise yaqin dilaen ki hum bhi zinda hain

ana ke zaKHmi KHuda indimal se bhi gae

bahut hi mahnga paDa un ko shauq-e-ham-safari

palaT ke aae to KHud apni chaal se bhi gae

junun hai zinat-e-tahzib-e-mahfil-e-yaran

amin-e-hosh-o-KHirad 'arz-e-haal se bhi gae

hamara zikr hai dimak-zada kitabon mein

hum ahl-e-'ilm-o-hunar the misal se bhi gae

badan ko toD rahi hai nai ruton ki thakan

ye karb-e-hijr ke lamhe visal se bhi gae

palaT ke jaane ki himmat muhajiron mein na thi

watan se bhi gae ahl-o-'ayal se bhi gae

hamare dost saf-e-dushmanan mein shamil hain

hum aise sada-mizaj apni Dhaal se bhi gae