ye aah-e-be-asar kya ho ye naKHl-e-be-samar kya ho

ye āh-e-be-asar kyā ho ye naḳhl-e-be-samar kyā ho

na ho jab dard hī yārab to dil kyā ho jigar kyā ho

baġhal-gīr aarzū se haiñ murādeñ aarzū mujh se

yahāñ is vaqt to ik iid hai tum jalva-gar kyā ho

muqaddar meñ ye likkhā hai kaTegī umr mar-mar kar

abhī se mar ga.e ham dekhiye ab umr bhar kyā ho

muravvat se ho begāna vafā se duur ho kosoñ

ye sach hai nāznīñ ho ḳhūb-sūrat ho magar kyā ho

lagā kar zaḳhm meñ Tāñke qazā terī na aa jaa.e

jo vo saffāk sun paa.e batā ai chāra-gar kyā ho

qayāmat ke bakheḌe paḌ ga.e aate hī duniyā meñ

ye maanā ham ne mar jaanā to mumkin hai magar kyā ho

kahā maiñ ne ki 'nazm'-e-mubtalā martā hai hasrat meñ

kahā us ne agar mar jaa.e to merā zarar kyā ho

ye aah-e-be-asar kya ho ye naKHl-e-be-samar kya ho

na ho jab dard hi yarab to dil kya ho jigar kya ho

baghal-gir aarzu se hain muraden aarzu mujh se

yahan is waqt to ek id hai tum jalwa-gar kya ho

muqaddar mein ye likkha hai kaTegi umr mar-mar kar

abhi se mar gae hum dekhiye ab umr bhar kya ho

murawwat se ho begana wafa se dur ho koson

ye sach hai naznin ho KHub-surat ho magar kya ho

laga kar zaKHm mein Tanke qaza teri na aa jae

jo wo saffak sun pae bata ai chaara-gar kya ho

qayamat ke bakheDe paD gae aate hi duniya mein

ye mana hum ne mar jaana to mumkin hai magar kya ho

kaha main ne ki 'nazm'-e-mubtala marta hai hasrat mein

kaha us ne agar mar jae to mera zarar kya ho