ye aalam ho to phir dil ko bhala kyunkar qarar aae

ye aalam ho to phir dil ko bhalā kyūñkar qarār aa.e

kisī kī yaad jab rah rah ke dil meñ baar baar aa.e

ajab andāz se mastānā-vār un kā shabāb aaya

chhalaktā jaam le kar jaise koī bāda-ḳhvār aa.e

mohabbat donoñ jānib pairvī kartī rahe lekin

na un ko e.atibār aa.e na mujh ko e.atibār aa.e

qafas hī jab nasheman hai to ronā kyā bahāroñ kā

balā se ab gulistāñ meñ ḳhizāñ aa.e bahār aa.e

qarār-o-be-qarārī lāzim-o-malzūm haiñ donoñ

na 'farmān' is pe harf aa.e na us par koī baar aa.e

ye aalam ho to phir dil ko bhala kyunkar qarar aae

kisi ki yaad jab rah rah ke dil mein bar bar aae

ajab andaz se mastana-war un ka shabab aaya

chhalakta jam le kar jaise koi baada-KHwar aae

mohabbat donon jaanib pairwi karti rahe lekin

na un ko eatibar aae na mujh ko eatibar aae

qafas hi jab nasheman hai to rona kya bahaaron ka

bala se ab gulistan mein KHizan aae bahaar aae

qarar-o-be-qarari lazim-o-malzum hain donon

na 'farman' is pe harf aae na us par koi bar aae