ye aankh tanz na ho zaKHm-e-dil hara na lage

ye aañkh tanz na ho zaḳhm-e-dil harā na lage

mujhe qarār to ho yā use hayā na lage

fishār-e-jāñ ho to kaifiyat-e-mukammal ho

vo iztirāb to ho iztirāb sā na lage

vo rū-ba-rū ho to ārā.ish-e-bayāñ bhī na ho

ki maiñ kahūñ to kisī aur kā kahā na lage

muāmalāt-e-mohabbat mizāj rakhte haiñ

tabī.ateñ hoñ jo yaksāñ to fāsla na lage

ḳhizāñ-rasīda chaman meñ bhī jhūltī ho bahār

guloñ se rañg kalī se mahak judā na lage

yahī to hotī hai vaz-e-shaguftan-e-mahtāb

miyān-e-abr ho yā āsmāñ khulā na lage

vahī to dard hai jo dard-e-mā-sivā samjhe

rifāqateñ hoñ to aalam nigār-ḳhāna lage

alam to ḳhair alam hai ki pā.edār nahīñ

vabāl hai jo ḳhushī bhī gurez-pā na lage

ulajh rahī haiñ ḳhayālī uḌaan se āñkheñ

kahīñ navishta-e-dīvār be-sadā na lage

ye aankh tanz na ho zaKHm-e-dil hara na lage

mujhe qarar to ho ya use haya na lage

fishaar-e-jaan ho to kaifiyat-e-mukammal ho

wo iztirab to ho iztirab sa na lage

wo ru-ba-ru ho to aaraish-e-bayan bhi na ho

ki main kahun to kisi aur ka kaha na lage

muamalat-e-mohabbat mizaj rakhte hain

tabiaten hon jo yaksan to fasla na lage

KHizan-rasida chaman mein bhi jhulti ho bahaar

gulon se rang kali se mahak juda na lage

yahi to hoti hai waz-e-shaguftan-e-mahtab

miyan-e-abr ho ya aasman khula na lage

wahi to dard hai jo dard-e-ma-siwa samjhe

rifaqaten hon to aalam nigar-KHana lage

alam to KHair alam hai ki paedar nahin

wabaal hai jo KHushi bhi gurez-pa na lage

ulajh rahi hain KHayali uDan se aankhen

kahin nawishta-e-diwar be-sada na lage