ye aarzu hai ki wo nama-bar se le kaghaz

ye aarzū hai ki vo nāma-bar se le kāġhaz

balā se phaaḌ ke phir haath meñ na le kāġhaz

vo kaun din hai ki ġhairoñ ko ḳhat nahīñ likhtā

qalam ke ban ko lage aag aur jale kāġhaz

tamām shahr meñ tash.hīr mere bad-ḳhū ne

payām-bar ko kiyā bāñdh kar gale kāġhaz

bahā duuñ aise ka.ī daftar ashk kī rau meñ

kiye haiñ jamā are ġhāfilo bhale kāġhaz

payām-bar mujhe aisā koī nahīñ miltā

ki hīla-jū se mire le hī kar Tale kāġhaz

'bayāñ' ko zof hai itnā ki bād-e-tund ke roz

jo ḳhat likhe to use le ke uḌ chale kāġhaz

ye aarzu hai ki wo nama-bar se le kaghaz

bala se phaD ke phir hath mein na le kaghaz

wo kaun din hai ki ghairon ko KHat nahin likhta

qalam ke ban ko lage aag aur jale kaghaz

tamam shahr mein tashhir mere bad-KHu ne

payam-bar ko kiya bandh kar gale kaghaz

baha dun aise kai daftar ashk ki rau mein

kiye hain jama are ghafilo bhale kaghaz

payam-bar mujhe aisa koi nahin milta

ki hila-ju se mere le hi kar Tale kaghaz

'bayan' ko zof hai itna ki baad-e-tund ke roz

jo KHat likhe to use le ke uD chale kaghaz