ye achchha hai ki ye achchha nahin hai

ye achchhā hai ki ye achchhā nahīñ hai

jo us se ab koī rishta nahīñ hai

vo hai vaisā kī ab vaisā nahīñ hai

use ik umr se dekhā nahīñ hai

rihā ho kar qafas se kyā karegā

parinde ne kabhī sochā nahīñ hai

na pūchho vaqt kī raftār ham se

guzartā hai magar dikhtā nahīñ hai

mujhe maqtal meñ rokā hai ye kah kar

tumheñ ab jaan kā ḳhatrā nahīñ hai

sabhī jannat meñ jaanā chāhte haiñ

ye dozaḳh ke liye achchhā nahīñ hai

ḳhushī kyuuñ phir rahī hai muñh phulā.e

mirā us se koī jhagḌā nahīñ hai

use patthar ke ho jaane kā Dar thā

palaT ke is liye dekhā nahīñ hai

ye kū-e-ishq hai is meñ se 'āsif'

nikalne kā koī rāstā nahīñ hai

ye achchha hai ki ye achchha nahin hai

jo us se ab koi rishta nahin hai

wo hai waisa ki ab waisa nahin hai

use ek umr se dekha nahin hai

riha ho kar qafas se kya karega

parinde ne kabhi socha nahin hai

na puchho waqt ki raftar hum se

guzarta hai magar dikhta nahin hai

mujhe maqtal mein roka hai ye kah kar

tumhein ab jaan ka KHatra nahin hai

sabhi jannat mein jaana chahte hain

ye dozaKH ke liye achchha nahin hai

KHushi kyun phir rahi hai munh phulae

mera us se koi jhagDa nahin hai

use patthar ke ho jaane ka Dar tha

palaT ke is liye dekha nahin hai

ye ku-e-ishq hai is mein se 'asif'

nikalne ka koi rasta nahin hai