ye adab ka hai safar aur safar mein hun main

ye adab kā hai safar aur safar meñ huuñ maiñ

ban ke alfāz tirī rāhguzar meñ huuñ maiñ

maiñ huuñ vo ḳhaak duāoñ ne uḌāyā jis ko

ab vahāñ huuñ ki sitāroñ kī nazar meñ huuñ maiñ

maiñ jalī sham.a sī to shaam ne thāmā dāman

ab mirā koī nahīñ hai ki sahar meñ huuñ maiñ

maiñ vahī kashtī huuñ haañ haañ vahī bebas kashtī

kal thī tūfāñ meñ ghirī aaj bhañvar meñ huuñ maiñ

kaun sī shai mah-e-tābāñ kiye jaatī hai mujhe

raat itnā to batā kis ke asar meñ huuñ maiñ

merī qismat meñ ye gahrā.ī sadā thī 'resham'

haañ jigar meñ thī ki ab dard-e-jigar meñ huuñ maiñ

ye adab ka hai safar aur safar mein hun main

ban ke alfaz teri rahguzar mein hun main

main hun wo KHak duaon ne uDaya jis ko

ab wahan hun ki sitaron ki nazar mein hun main

main jali shama si to sham ne thama daman

ab mera koi nahin hai ki sahar mein hun main

main wahi kashti hun han han wahi bebas kashti

kal thi tufan mein ghiri aaj bhanwar mein hun main

kaun si shai mah-e-taban kiye jati hai mujhe

raat itna to bata kis ke asar mein hun main

meri qismat mein ye gahrai sada thi 'resham'

han jigar mein thi ki ab dard-e-jigar mein hun main