ye ahl-e-KHirad dair-o-haram dekh rahe hain

ye ahl-e-ḳhirad dair-o-haram dekh rahe haiñ

jo sab ne na dekhā hai vo ham dekh rahe haiñ

ham gesū-e-hālāt meñ ḳham dekh rahe haiñ

taqdīr meñ jo kuchh hai raqam dekh rahe haiñ

ġham ye to nahīñ hai hameñ ġham ghere hue haiñ

ġham ye hai ki har aañkh ko nam dekh rahe haiñ

tārīk makānoñ ko ziyā ham se milī hai

ab tujh ko pareshāñ shab-e-ġham dekh rahe haiñ

hal to unheñ karne haiñ ye urdu ke masā.il

jumloñ meñ mire kitnā hai dam dekh rahe haiñ

jis haath ko likhne kā salīqa nahīñ aayā

us haath meñ sone kī qalam dekh rahe haiñ

hāsil hai hameñ 'mast' ye me'rāj-e-mohabbat

har vaqt tasavvur meñ haram dekh rahe haiñ

ye ahl-e-KHirad dair-o-haram dekh rahe hain

jo sab ne na dekha hai wo hum dekh rahe hain

hum gesu-e-haalat mein KHam dekh rahe hain

taqdir mein jo kuchh hai raqam dekh rahe hain

gham ye to nahin hai hamein gham ghere hue hain

gham ye hai ki har aankh ko nam dekh rahe hain

tarik makanon ko ziya hum se mili hai

ab tujh ko pareshan shab-e-gham dekh rahe hain

hal to unhen karne hain ye urdu ke masail

jumlon mein mere kitna hai dam dekh rahe hain

jis hath ko likhne ka saliqa nahin aaya

us hath mein sone ki qalam dekh rahe hain

hasil hai hamein 'mast' ye me'raj-e-mohabbat

har waqt tasawwur mein haram dekh rahe hain