ye aisa hota hai aatish-fishan se pahle

ye aisā hotā hai ātish-fishān se pahle

darak rahī haiñ zamīneñ chaTān se pahle

na.ī rutoñ se javāñ hausle hī ġhā.eb haiñ

parinde Tuut rahe haiñ uḌaan se pahle

phir is ke baa'd mire ġham ko niiñd aa.egī

sitāre TūTeñge kuchh āsmān se pahle

ye shīn-o-qāf to az-ḳhud hī Thiik ho jaa.eñ

banāo rābta urdu zabān se pahle

ye bachpanā bhī javānī bhī aur buḌhāpā bhī

ka.ī paḌāv mileñge makān se pahle

nishān-e-dil to hai betāb zaḳhm khāne ko

nazar kā tiir to nikle kamān se pahle

hameñ milā hai ye ajdād se virāsat meñ

ham apnī aan bachāte haiñ jaan se pahle

ye aisa hota hai aatish-fishan se pahle

darak rahi hain zaminen chaTan se pahle

nai ruton se jawan hausle hi ghaeb hain

parinde Tut rahe hain uDan se pahle

phir is ke ba'd mere gham ko nind aaegi

sitare TuTenge kuchh aasman se pahle

ye shin-o-qaf to az-KHud hi Thik ho jaen

banao rabta urdu zaban se pahle

ye bachpana bhi jawani bhi aur buDhapa bhi

kai paDaw milenge makan se pahle

nishan-e-dil to hai betab zaKHm khane ko

nazar ka tir to nikle kaman se pahle

hamein mila hai ye ajdad se wirasat mein

hum apni aan bachate hain jaan se pahle