ye aqida hai mera ghaib se saman hoga

ye aqīda hai mirā ġhaib se sāmāñ hogā

dard kī Thes lagī dard hī darmāñ hogā

āsmāñ badle zamīñ badle zamāna badle

ishq āsān na thā aur na āsāñ hogā

raushnī terī jhalaktī hī rahegī ai dost

kabhī āñkhoñ meñ kabhī dil meñ charāġhāñ hogā

dekh to luuñ maiñ tasavvur meñ tujhe bhī lekin

aur hairān ye ā.īna-e-hairāñ hogā

āñsuoñ se na sahī dil kī tajallī se sahī

terā jalva to bahar-taur numāyāñ hogā

ham se pūchho to batā.eñ ki haqīqat kyā hai

ḳhaak thā ḳhaak hai aur ḳhaak hī insāñ hogā

siikh lo zulf-e-pareshāñ kī pareshānī se

jo pareshān karegā vo pareshāñ hogā

baat dil meñ hī rahī dil kī na hone paa.ī

ham ne sochā thā ki har ghar meñ charāġhāñ hogā

dil meñ jo kuchh hai 'sadaf' Tapkegā aañsū ban kar

raaz kī baat na kar raaz numāyāñ hogā

ye aqida hai mera ghaib se saman hoga

dard ki Thes lagi dard hi darman hoga

aasman badle zamin badle zamana badle

ishq aasan na tha aur na aasan hoga

raushni teri jhalakti hi rahegi ai dost

kabhi aankhon mein kabhi dil mein charaghan hoga

dekh to lun main tasawwur mein tujhe bhi lekin

aur hairan ye aaina-e-hairan hoga

aansuon se na sahi dil ki tajalli se sahi

tera jalwa to bahar-taur numayan hoga

hum se puchho to bataen ki haqiqat kya hai

KHak tha KHak hai aur KHak hi insan hoga

sikh lo zulf-e-pareshan ki pareshani se

jo pareshan karega wo pareshan hoga

baat dil mein hi rahi dil ki na hone pai

hum ne socha tha ki har ghar mein charaghan hoga

dil mein jo kuchh hai 'sadaf' Tapkega aansu ban kar

raaz ki baat na kar raaz numayan hoga