ye arz kya hai KHala kya hai aur sama kya hai

ye arz kyā hai ḳhalā kyā hai aur samā kyā hai

tirī hī zaat hai har-sū tire sivā kyā hai

ye mashġhala hai tamāsha hai silsila kyā hai

banā banā ke miTātā hai mājrā kyā hai

jo soz-e-dil se mubarrā ho vo duā kyā hai

jo ruuh meñ na utar jaa.e vo sadā kyā hai

sañbhālā dar ko to dīvār gir paḌī logo

ye ittifāq agar hai to sāneha kyā hai

fanā ho jis kā muqaddar use shumār na kar

bas ek hī kā tasavvur hai dūsrā kyā hai

na jeb hai na garebāñ na ab gumān-e-hayāt

hamāre paas tirī yaad ke sivā kyā hai

hisār-e-zāt se apnī agar nikal jaa.e

to phir na pūchh ki insāñ kā martaba kyā hai

ḳhalish bhī chāhiye rasm-o-rah-e-mohabbat meñ

mile na dard kī lazzat to phir vafā kyā hai

junūñ ke daur meñ ādāb-e-ishq kyā 'shāriq'

kise ḳhabar hai ravā kyā hai nāravā kyā hai

ye arz kya hai KHala kya hai aur sama kya hai

teri hi zat hai har-su tere siwa kya hai

ye mashghala hai tamasha hai silsila kya hai

bana bana ke miTata hai majra kya hai

jo soz-e-dil se mubarra ho wo dua kya hai

jo ruh mein na utar jae wo sada kya hai

sanbhaala dar ko to diwar gir paDi logo

ye ittifaq agar hai to saneha kya hai

fana ho jis ka muqaddar use shumar na kar

bas ek hi ka tasawwur hai dusra kya hai

na jeb hai na gareban na ab guman-e-hayat

hamare pas teri yaad ke siwa kya hai

hisar-e-zat se apni agar nikal jae

to phir na puchh ki insan ka martaba kya hai

KHalish bhi chahiye rasm-o-rah-e-mohabbat mein

mile na dard ki lazzat to phir wafa kya hai

junun ke daur mein aadab-e-ishq kya 'shaariq'

kise KHabar hai rawa kya hai narawa kya hai