ye ashk-e-gham nahin izhaar-e-bekasi ke liye

ye ashk-e-ġham nahīñ iz.hār-e-bekasī ke liye

charāġh maiñ ne jalā.e the raushnī ke liye

tire shabāb kī ḳhushbū ho jin ke dāman meñ

kahāñ se lā.ūñ vo alfāz shā.erī ke liye

ḳhushī ke saath ġhamoñ kā bhī kuchh salīqa ho

shu.ūr-e-dard bhī lāzim hai aadmī ke liye

fareb-e-jubba-o-dastār de na yuuñ mujh ko

ḳhulūs shart hai ai dost bandagī ke liye

kisī ko aaj yahāñ āḳhirat kī fikr nahīñ

sab ehtimām hai do din kī zindagī ke liye

har ek saañs meñ kam ho rahī hai umr-e-ravāñ

ajal se haath milātā huuñ zindagī ke liye

ye aur baat na mauqa milā sunāne kā

ġhazal kahī thī ye 'rizvāñ' ne aap hī ke liye

ye ashk-e-gham nahin izhaar-e-bekasi ke liye

charagh main ne jalae the raushni ke liye

tere shabab ki KHushbu ho jin ke daman mein

kahan se laun wo alfaz shaeri ke liye

KHushi ke sath ghamon ka bhi kuchh saliqa ho

shuur-e-dard bhi lazim hai aadmi ke liye

fareb-e-jubba-o-dastar de na yun mujh ko

KHulus shart hai ai dost bandagi ke liye

kisi ko aaj yahan aaKHirat ki fikr nahin

sab ehtimam hai do din ki zindagi ke liye

har ek sans mein kam ho rahi hai umr-e-rawan

ajal se hath milata hun zindagi ke liye

ye aur baat na mauqa mila sunane ka

ghazal kahi thi ye 'rizwan' ne aap hi ke liye