ye aur baat hai har shaKHs ke guman mein nahin

ye aur baat hai har shaḳhs ke gumāñ meñ nahīñ

zamīñ kahāñ hai jo āġhosh-e-āsmāñ meñ nahīñ

ziyā-farāz jahāñ haiñ hazār māh-o-nujūm

charāġh koī magar mere āshiyāñ meñ nahīñ

vafūr-e-ishq kī nairañgiyāñ are tauba

jo dil meñ dard hai vo dil kī dāstāñ meñ nahīñ

tum apnā tīr-e-adā merī ruuh meñ DhūñDo

in abaruoñ kī lachaktī huī kamāñ meñ nahīñ

ye aur baat ki gulshan pe gir paḌe bijlī

kamī to koshish-e-tanzīm-e-gulsitāñ meñ nahīñ

jo apnī sust-ravī kā 'ilāj kar na sake

maqām us kā koī ahl-e-kārvāñ meñ nahīñ

rumūz-e-uqbā se ahl-e-zamīñ hoñ kyā vāqif

kisī bhī pahlū koī rabt do-jahāñ meñ nahīñ

'falak' maiñ kaifiyyat-e-dil se ḳhud pareshāñ huuñ

kisī fuġhāñ meñ asar hai kisī fuġhāñ meñ nahīñ

ye aur baat hai har shaKHs ke guman mein nahin

zamin kahan hai jo aaghosh-e-asman mein nahin

ziya-faraaz jahan hain hazar mah-o-nujum

charagh koi magar mere aashiyan mein nahin

wafur-e-ishq ki nairangiyan are tauba

jo dil mein dard hai wo dil ki dastan mein nahin

tum apna tir-e-ada meri ruh mein DhunDo

in abaruon ki lachakti hui kaman mein nahin

ye aur baat ki gulshan pe gir paDe bijli

kami to koshish-e-tanzim-e-gulsitan mein nahin

jo apni sust-rawi ka 'ilaj kar na sake

maqam us ka koi ahl-e-karwan mein nahin

rumuz-e-uqba se ahl-e-zamin hon kya waqif

kisi bhi pahlu koi rabt do-jahan mein nahin

'falak' main kaifiyyat-e-dil se KHud pareshan hun

kisi fughan mein asar hai kisi fughan mein nahin