ye aur baat main gham se niDhaal bhi to nahin

ye aur baat maiñ ġham se niDhāl bhī to nahīñ

use gañvā ke tabī.at bahāl bhī to nahīñ

sulagtī sochtī ujḌī udaas āñkhoñ meñ

tumhāre qurb kī raushan misāl bhī to nahīñ

jab itne dil-zada Thahre to maan bhī jaao

ki us ke va.ada-e-fardā kā haal bhī to nahīñ

vo ġhair kī tarah miltā hai roz kyā kiije

firāq bhī to nahīñ hai visāl bhī to nahīñ

yahī hai ḳhū-e-taġhāful to umr bhar na milo

ye sirf merī anā kā savāl bhī to nahīñ

uThī ab āshiqī yā log ho ga.e patthar

tumhāre husn pe ab tak zavāl bhī to nahīñ

bujhe gharoñ kā dhuāñ sā hai shahr meñ 'sarmad'

ye aur kuchh hai sahar kā jamāl bhī to nahīñ

ye aur baat main gham se niDhaal bhi to nahin

use ganwa ke tabiat bahaal bhi to nahin

sulagti sochti ujDi udas aankhon mein

tumhaare qurb ki raushan misal bhi to nahin

jab itne dil-zada Thahre to man bhi jao

ki us ke wada-e-farda ka haal bhi to nahin

wo ghair ki tarah milta hai roz kya kije

firaq bhi to nahin hai visal bhi to nahin

yahi hai KHu-e-taghaful to umr bhar na milo

ye sirf meri ana ka sawal bhi to nahin

uThi ab aashiqi ya log ho gae patthar

tumhaare husn pe ab tak zawal bhi to nahin

bujhe gharon ka dhuan sa hai shahr mein 'sarmad'

ye aur kuchh hai sahar ka jamal bhi to nahin