ye baat alag hai na ho izhaar-e-tamanna

ye baat alag hai na ho iz.hār-e-tamannā

insāñ hai bahar-hāl giraftār-e-tamanna

har chiiz yahāñ biktī hai jo chāho ḳharīdo

vallāh bahut ḳhuub hai bāzār-e-tamannā

maTkā hai udhar mai kā nashe kā hai tasallut

laTkā hai idhar koī sar-e-dār-e-tamanna

mahrūmī-e-qismat kī sazā kaaT rahā huuñ

iqrār hai mujh ko huuñ gunahgār-e-tamannā

maġhrūr hasīna sī haiñ takmīl kī rāheñ

lāzim hai bahut ūñchā ho me’ār-e-tamannā

hushiyār zarā aage havas kā hai 'ilāqa

behtar hai yahīñ rok lo raftār-e-tamanna

ye baat alag hai na ho izhaar-e-tamanna

insan hai bahar-haal giraftar-e-tamanna

har chiz yahan bikti hai jo chaho KHarido

wallah bahut KHub hai bazar-e-tamanna

maTka hai udhar mai ka nashe ka hai tasallut

laTka hai idhar koi sar-e-dar-e-tamanna

mahrumi-e-qismat ki saza kaT raha hun

iqrar hai mujh ko hun gunahgar-e-tamanna

maghrur hasina si hain takmil ki rahen

lazim hai bahut uncha ho me’ar-e-tamanna

hushiyar zara aage hawas ka hai 'ilaqa

behtar hai yahin rok lo raftar-e-tamanna