ye baat aql se bahar hai kya kiya jae

ye baat 'aql se bāhar hai kyā kiyā jaa.e

har ek qatra samandar hai kyā kiyā jaa.e

agar ho vāqif-e-tā.ef to pūchhte kyoñ ho

har ek haath meñ patthar hai kyā kiyā jaa.e

karīh shakl jise kah rahā hai tū nādāñ

hamāre sar pe vo chhappar hai kyā kiyā jaa.e

badalte vaqt ne sab khel haiñ badal Daale

vazīr ab yahāñ joker hai kyā kiyā jaa.e

tumhāre paas qavāfī ḳhayāl laate haiñ

merā ḳhayāl hī rahbar hai kyā kiyā jaa.e

ġhazal vo aaj bhī roman meñ likh ke laayā hai

hujūm us pe nichhāvar hai kyā kiyā jaa.e

'na'īm' jaa.eñ kahāñ kāsa-e-hunar le kar

tamām shahr suḳhanvar hai kyā kiyā jaa.e

ye baat 'aql se bahar hai kya kiya jae

har ek qatra samandar hai kya kiya jae

agar ho waqif-e-taef to puchhte kyon ho

har ek hath mein patthar hai kya kiya jae

karih shakl jise kah raha hai tu nadan

hamare sar pe wo chhappar hai kya kiya jae

badalte waqt ne sab khel hain badal Dale

wazir ab yahan joker hai kya kiya jae

tumhaare pas qawafi KHayal late hain

mera KHayal hi rahbar hai kya kiya jae

ghazal wo aaj bhi roman mein likh ke laya hai

hujum us pe nichhawar hai kya kiya jae

'na'im' jaen kahan kasa-e-hunar le kar

tamam shahr suKHanwar hai kya kiya jae