ye baat jaan nahin paya aaina-gar kya

ye baat jaan nahīñ paayā ā.ina-gar kyā

na ho koī pas-e-manzar to phir hai manzar kyā

abhī talak mirī ḳhāna-ḳharābiyāñ na ga.iiñ

chhupā hai aaj bhī shaitān mere andar kyā

hai sab hamārī ‘aqīdat kī kār-farmā.ī

vagarna devtā hotā hai koī patthar kyā

kisī kī yaad meñ jiite haiñ aur marte haiñ

hai mashġhala koī duniyā meñ is se behtar kyā

hamārī pyaas to shabnam se bujh bhī saktī thī

hamāre vāste laa.e ho tum samandar kyā

chamak uThe mirī palkoñ pe ashk ke jugnū

hue haiñ daaġh mire dil ke phir munavvar kyā

ye kyā huā hai ki be-rabt ho ga.e nuqte

badal gayā hai mire dā.ere kā mehvar kyā

chamaktī dhuup hai rasta hai yād-e-manzil hai

batāo mausam-e-dīvāngī meñ ab ghar kyā

'zakī' hamesha nuqūsh-e-ġhazal nikhārte ho

tumheñ haiñ is kī rivāyāt saarī azbar kyā

ye baat jaan nahin paya aaina-gar kya

na ho koi pas-e-manzar to phir hai manzar kya

abhi talak meri KHana-KHarabiyan na gain

chhupa hai aaj bhi shaitan mere andar kya

hai sab hamari ‘aqidat ki kar-farmai

wagarna dewta hota hai koi patthar kya

kisi ki yaad mein jite hain aur marte hain

hai mashghala koi duniya mein is se behtar kya

hamari pyas to shabnam se bujh bhi sakti thi

hamare waste lae ho tum samandar kya

chamak uThe meri palkon pe ashk ke jugnu

hue hain dagh mere dil ke phir munawwar kya

ye kya hua hai ki be-rabt ho gae nuqte

badal gaya hai mere daere ka mehwar kya

chamakti dhup hai rasta hai yaad-e-manzil hai

batao mausam-e-diwangi mein ab ghar kya

'zaki' hamesha nuqush-e-ghazal nikhaarte ho

tumhein hain is ki riwayat sari azbar kya