ye baat sach hai abhi mukammal to ishq mera hua nahin hai

ye baat sach hai abhī mukammal to 'ishq merā huā nahīñ hai

abhī to dāman phaTā nahīñ hai lahū nazar se bahā nahīñ hai

bahut purānī kitāb se jo gulāb niklā to aah niklī

is aah se ye 'ayāñ huā hai ki zaḳhm dil kā bharā nahīñ hai

‘ibādatoñ kī tarah mohabbat kā vird kartā huuñ aur karūñgā

tirī nazar meñ ḳhatā hai lekin mirī nazar meñ ḳhatā nahīñ hai

tumhārā thā maiñ tumhārā huuñ aur sadā rahūñgā tumhārā ban kar

yaqīn jaano bichhaḌ ke tum se ye dil kisī ko diyā nahīñ hai

milan hai pahlā ḳhayāl rakhnā tavīl is se na baat karnā

namāz-e-maġhrib ise samajhnā ki ye namāz-e-‘ishā nahīñ hai

ye baat sach hai abhi mukammal to 'ishq mera hua nahin hai

abhi to daman phaTa nahin hai lahu nazar se baha nahin hai

bahut purani kitab se jo gulab nikla to aah nikli

is aah se ye 'ayan hua hai ki zaKHm dil ka bhara nahin hai

‘ibaadaton ki tarah mohabbat ka wird karta hun aur karunga

teri nazar mein KHata hai lekin meri nazar mein KHata nahin hai

tumhaara tha main tumhaara hun aur sada rahunga tumhaara ban kar

yaqin jaano bichhaD ke tum se ye dil kisi ko diya nahin hai

milan hai pahla KHayal rakhna tawil is se na baat karna

namaz-e-maghrib ise samajhna ki ye namaz-e-‘isha nahin hai