ye bazi KHud hai haari dekhne ko

ye baazī ḳhud hai haarī dekhne ko

tumhārī hoshiyārī dekhne ko

dhanak paañv paTakne lag ga.ī hai

tirī naqsh-o-nigārī dekhne ko

hamārī aañkh ab pathrā chukī haiñ

jahāñ meñ inkisārī dekhne ko

sunā hai 'ishq vaale aa rahe haiñ

faqat joḌī hamārī dekhne ko

tumheñ is daur kā hākim banāyā

yahī be-rozgārī dekhne ko

lakaḌ-hāroñ kā lashkar chal paḌā hai

shajar kī āh-o-zārī dekhne ko

ta'alluq ke gale meñ Daal rassī

hamārī be-qarārī dekhne ko

jo baisākhī ke kāñdhe par khaḌe haiñ

taraste haiñ savārī dekhne ko

ye kaisā khel khelā dil se tū ne

chale aa.eñ madārī dekhne ko

ye bazi KHud hai haari dekhne ko

tumhaari hoshiyari dekhne ko

dhanak panw paTakne lag gai hai

teri naqsh-o-nigari dekhne ko

hamari aankh ab pathra chuki hain

jahan mein inkisari dekhne ko

suna hai 'ishq wale aa rahe hain

faqat joDi hamari dekhne ko

tumhein is daur ka hakim banaya

yahi be-rozgari dekhne ko

lakaD-haaron ka lashkar chal paDa hai

shajar ki aah-o-zari dekhne ko

ta'alluq ke gale mein Dal rassi

hamari be-qarari dekhne ko

jo baisakhi ke kandhe par khaDe hain

taraste hain sawari dekhne ko

ye kaisa khel khela dil se tu ne

chale aaen madari dekhne ko