ye be-hisi ki zara bhi wo pesh-o-pas mein na tha

ye be-hisī ki zarā bhī vo pesh-o-pas meñ na thā

asiir jaise nasheman meñ thā qafas meñ na thā

shikast-e-husn gavārā na thī mujhe varna

nahīñ ye baat ki vo merī dastaras meñ na thā

bharam vafā kā ḳhulūs-e-niyāz ne rakkhā

vagarna farq koī ishq aur havas meñ na thā

na adl kā thā taqāzā na zulm kā ehsās

jo dād-ḳhvāh meñ jazba thā dādras meñ na thā

gul-o-saman ke sahāre ḳhizāñ dar aa.ī thī

asar bahār-e-chaman kā to ḳhār-o-ḳhas meñ na thā

husūl-e-shauq meñ majbūr-e-kashmakash donoñ

asiir thā vo anā kā dil apne bas meñ na thā

kamī thī us meñ 'mubārak' na aur kuchh lekin

vo ik ḳhulūs thā jo mere ham-nafas meñ na thā

ye be-hisi ki zara bhi wo pesh-o-pas mein na tha

asir jaise nasheman mein tha qafas mein na tha

shikast-e-husn gawara na thi mujhe warna

nahin ye baat ki wo meri dastaras mein na tha

bharam wafa ka KHulus-e-niyaz ne rakkha

wagarna farq koi ishq aur hawas mein na tha

na adl ka tha taqaza na zulm ka ehsas

jo dad-KHwah mein jazba tha dadras mein na tha

gul-o-saman ke sahaare KHizan dar aai thi

asar bahaar-e-chaman ka to KHar-o-KHas mein na tha

husul-e-shauq mein majbur-e-kashmakash donon

asir tha wo ana ka dil apne bas mein na tha

kami thi us mein 'mubarak' na aur kuchh lekin

wo ek KHulus tha jo mere ham-nafas mein na tha