ye be-KHulus hai duniya na dar-ba-dar jao

ye be-ḳhulūs hai duniyā na dar-ba-dar jaao

ab apnā kāsa-e-dil le ke apne ghar jaao

chaḌhāv par hai ye dariyā abhī Thahar jaao

agar hai ḳhud pe bharosa to paar utar jaao

faqat mire hī lahū kī hai pyaas ḳhanjar ko

tum apnī rāhoñ pe be-ḳhauf-o-be-ḳhatar jaao

har ek chehre pe sūraj talāshne vaalo

kahīñ na din ke ujāle meñ hī bikhar jaao

tamām jism mujhe barf barf lagte haiñ

nazar kī dhuup sameTe hue guzar jaao

añdherī rātoñ kī palkeñ bahut ghanerī haiñ

hamārī āñkhoñ kī putlī meñ hī Thahar jaao

maiñ kaaT lūñgā kisī tarah apnī tīra-shabī

tum apne vāste le kar mirī sahar jaao

ab is ke baa'd mujhe kūfiyoñ meñ ghirnā hai

yahīñ se lauT ke vāpas ai ham-safar jaao

ye be-saroñ kā nagar hai to ye karo 'anvar'

sar-e-ḳhudī ko tum apne sañbhāl kar jaao

ye be-KHulus hai duniya na dar-ba-dar jao

ab apna kasa-e-dil le ke apne ghar jao

chaDhaw par hai ye dariya abhi Thahar jao

agar hai KHud pe bharosa to par utar jao

faqat mere hi lahu ki hai pyas KHanjar ko

tum apni rahon pe be-KHauf-o-be-KHatar jao

har ek chehre pe suraj talashne walo

kahin na din ke ujale mein hi bikhar jao

tamam jism mujhe barf barf lagte hain

nazar ki dhup sameTe hue guzar jao

andheri raaton ki palken bahut ghaneri hain

hamari aankhon ki putli mein hi Thahar jao

main kaT lunga kisi tarah apni tira-shabi

tum apne waste le kar meri sahar jao

ab is ke ba'd mujhe kufiyon mein ghirna hai

yahin se lauT ke wapas ai ham-safar jao

ye be-saron ka nagar hai to ye karo 'anwar'

sar-e-KHudi ko tum apne sanbhaal kar jao