ye bhi apni jagah riyazat hai

ye bhī apnī jagah riyāzat hai

ḳhidmat-e-ḳhalq bhī ibādat hai

zindagī par na koī itrā.e

zindagī maut kī amānat hai

moḌ deñ baḌh ke ruḳh havādis kā

ab bhī vo himmat-o-jasārat hai

āj-kal dostī ke parde meñ

nafrat-o-buġhz hai adāvat hai

yūrish-e-barq-o-bār ke bā-vasf

āshiyāna mirā salāmat hai

miT ga.e ham jo miT ga.ī urdu

ek shā.ir kī ye bashārat hai

in dinoñ zindagī mirī 'zākir'

ek bosīda sī imārat hai

ye bhi apni jagah riyazat hai

KHidmat-e-KHalq bhi ibaadat hai

zindagi par na koi itrae

zindagi maut ki amanat hai

moD den baDh ke ruKH hawadis ka

ab bhi wo himmat-o-jasarat hai

aaj-kal dosti ke parde mein

nafrat-o-bughz hai adawat hai

yurish-e-barq-o-bar ke ba-wasf

aashiyana mera salamat hai

miT gae hum jo miT gai urdu

ek shair ki ye bashaarat hai

in dinon zindagi meri 'zakir'

ek bosida si imarat hai