ye bhi ji chura baiThi bar-e-gham uThane se

ye bhī jī churā baiThī bār-e-ġham uThāne se

ziist de ga.ī dhoka maut ke bahāne se

dard ko kisī pahlū chain hī nahīñ aatā

zindagī musībat hai dil ke Tuut jaane se

fitrat-e-mohabbat kā rang hī nirālā hai

yaad aate jaate haiñ aur vo bhulāne se

kis qadar talavvun hai aadmī kī fitrat meñ

mutma.in nahīñ hotā ye kisī bahāne se

aap ho ga.e nālāñ maut ho ga.ī āsāñ

ḳhatm ho gayā tūfāñ dil ke Duub jaane se

nā'ra-e-anal-haq se ham to sirf ye samjhe

baat thī chhupāne kī kah ga.e zamāne se

paḌ ga.ī haiñ buniyādeñ har jagah nasheman kī

gir ga.e the tinke kuchh mere āshiyāne se

dostoñ se ai 'maikash' be-ruḳhī kā shikva kyā

rasm hī mohabbat kī uTh ga.ī zamāne se

ye bhi ji chura baiThi bar-e-gham uThane se

zist de gai dhoka maut ke bahane se

dard ko kisi pahlu chain hi nahin aata

zindagi musibat hai dil ke Tut jaane se

fitrat-e-mohabbat ka rang hi nirala hai

yaad aate jate hain aur wo bhulane se

kis qadar talawwun hai aadmi ki fitrat mein

mutmain nahin hota ye kisi bahane se

aap ho gae nalan maut ho gai aasan

KHatm ho gaya tufan dil ke Dub jaane se

na'ra-e-anal-haq se hum to sirf ye samjhe

baat thi chhupane ki kah gae zamane se

paD gai hain buniyaaden har jagah nasheman ki

gir gae the tinke kuchh mere aashiyane se

doston se ai 'maikash' be-ruKHi ka shikwa kya

rasm hi mohabbat ki uTh gai zamane se