ye bhi mere nasib ki hai baat kuchh na kuchh

ye bhī mire nasīb kī hai baat kuchh na kuchh

chalte haiñ hādsāt mire saat kuchh na kuchh

badle hue chaman ke haiñ hālāt kuchh na kuchh

ḳhāmosh haiñ fazā.eñ to hai baat kuchh na kuchh

namrūd kā vo bhaa.ī hai fir'aun kā rafīq

fitne uThātā rahtā hai bad-zāt kuchh na kuchh

zālim ko merā qatl hai maqsūd is liye

sāzish vo kartā rahtā hai din raat kuchh na kuchh

is dil pe iḳhtiyār use ham ne kyā diyā

zaḳhmī vo kartā rahtā hai jazbāt kuchh na kuchh

yuuñ bhī kisī kī bazm meñ jaate nahīñ haiñ ham

muñh se hamāre niklegī haq baat kuchh na kuchh

merī tabāhiyoñ meñ mire dushmanoñ ke saath

apnoñ kā bhī rahā hai mire haath kuchh na kuchh

ham bhī kabhī amiir the jholī meñ apnī dekh

ghar kī hamāre niklegī ḳhairāt kuchh na kuchh

sach bolne kā shauq bahut hai tumheñ 'samar'

duniyā se is kī pāoge sauġhāt kuchh na kuchh

ye bhi mere nasib ki hai baat kuchh na kuchh

chalte hain hadsat mere sat kuchh na kuchh

badle hue chaman ke hain haalat kuchh na kuchh

KHamosh hain fazaen to hai baat kuchh na kuchh

namrud ka wo bhai hai fir'aun ka rafiq

fitne uThata rahta hai bad-zat kuchh na kuchh

zalim ko mera qatl hai maqsud is liye

sazish wo karta rahta hai din raat kuchh na kuchh

is dil pe iKHtiyar use hum ne kya diya

zaKHmi wo karta rahta hai jazbaat kuchh na kuchh

yun bhi kisi ki bazm mein jate nahin hain hum

munh se hamare niklegi haq baat kuchh na kuchh

meri tabahiyon mein mere dushmanon ke sath

apnon ka bhi raha hai mere hath kuchh na kuchh

hum bhi kabhi amir the jholi mein apni dekh

ghar ki hamare niklegi KHairaat kuchh na kuchh

sach bolne ka shauq bahut hai tumhein 'samar'

duniya se is ki paoge saughat kuchh na kuchh