ye bhi mumkin hai ki aankhen ho tamasha hi na ho

ye bhī mumkin hai ki āñkheñ ho tamāshā hī na ho

raas aane lage ham ko to ye duniyā hī na ho

zindagī chāheñ to ḳhvāboñ se sivā kuchh na mile

Dūbnā chāheñ to hāsil hameñ dariyā hī na ho

dil ko ḳhush karne ko DhūñDe haiñ bahāne ham ne

ab palaT kar zarā dekheñ kahīñ aayā hī na ho

ab to bas sā.at-e-gum-karda kī yādeñ baaqī

ye vo jañgal hai ki jis meñ koī rastā hī na ho

kaam kyā degā vo TuuTā huā ā.īna bhī

yaad rakhne ko vahī aks vo chehrā hī na ho

hijr ko shauq-e-mudāvā hī samajh kar jī leñ

zindagī tujh se ulajhne kā to yaarā hī na ho

ye bhi mumkin hai ki aankhen ho tamasha hi na ho

ras aane lage hum ko to ye duniya hi na ho

zindagi chahen to KHwabon se siwa kuchh na mile

Dubna chahen to hasil hamein dariya hi na ho

dil ko KHush karne ko DhunDe hain bahane hum ne

ab palaT kar zara dekhen kahin aaya hi na ho

ab to bas saat-e-gum-karda ki yaaden baqi

ye wo jangal hai ki jis mein koi rasta hi na ho

kaam kya dega wo TuTa hua aaina bhi

yaad rakhne ko wahi aks wo chehra hi na ho

hijr ko shauq-e-mudawa hi samajh kar ji len

zindagi tujh se ulajhne ka to yara hi na ho