ye bhi mumkin hai mujhe tujhse mohabbat na rahe

ye bhī mumkin hai mujhe tujh se mohabbat na rahe

yā rahe bhī to tirī aur zarūrat na rahe

sochtī huuñ ki koī rāsta mil jaa.e mujhe

jahāñ baaqī tire Takrāne kī sūrat na rahe

is se behtar to mujhe ‘ālam-e-mad.hoshī hai

'ālam-e-hosh meñ baaqī jahāñ hairat na rahe

jis haqārat se mirī chaah ko radd tū ne kiyā

kaash aisā ho kisī ko tirī chāhat na rahe

dam-e-āḳhir yuuñ palaT kar mujhe dekhā us ne

jaise bande ko kisī shai kī zarūrat na rahe

itnī ban jaa.e faqat dil meñ mohabbat kī jagah

koī ranjish na rahe koī kudūrat na rahe

ye bhi mumkin hai mujhe tujh se mohabbat na rahe

ya rahe bhi to teri aur zarurat na rahe

sochti hun ki koi rasta mil jae mujhe

jahan baqi tere Takrane ki surat na rahe

is se behtar to mujhe ‘alam-e-madhoshi hai

'alam-e-hosh mein baqi jahan hairat na rahe

jis haqarat se meri chah ko radd tu ne kiya

kash aisa ho kisi ko teri chahat na rahe

dam-e-aKHir yun palaT kar mujhe dekha us ne

jaise bande ko kisi shai ki zarurat na rahe

itni ban jae faqat dil mein mohabbat ki jagah

koi ranjish na rahe koi kudurat na rahe