ye bhi nahin ummid ki bedad karoge

ye bhī nahīñ ummīd ki bedād karoge

tum aise kahāñ ho ki mujhe yaad karoge

kyā mere liye ġhair ko nāshād karoge

tum yuuñ bhī sitam Dhāoge bedād karoge

do-chār ghaḌī aur hai duniyā meñ baserā

ab zulm karoge agar āzād karoge

ye hijr na jaane mujhe kyā vaqt dikhā.e

aur tum kisī bad-baḳht ko kyoñ yaad karoge

taqdīr ke maare ko satānā nahīñ achchhā

barbād ko tum aur kyā barbād karoge

maiñ ḳhuub samajhtā huuñ tumhārī ye sharārat

nāshād karoge tum agar shaad karoge

tum jā to rahe ho magar itnā to batā do

taqdīr ke maare ko kabhī yaad karoge

tāsīr se ḳhālī nahīñ 'bismil' kā taḌapnā

ye yaad rahe tum ko ki tum yaad karoge

ye bhi nahin ummid ki bedad karoge

tum aise kahan ho ki mujhe yaad karoge

kya mere liye ghair ko nashad karoge

tum yun bhi sitam Dhaoge bedad karoge

do-chaar ghaDi aur hai duniya mein basera

ab zulm karoge agar aazad karoge

ye hijr na jaane mujhe kya waqt dikhae

aur tum kisi bad-baKHt ko kyon yaad karoge

taqdir ke mare ko satana nahin achchha

barbaad ko tum aur kya barbaad karoge

main KHub samajhta hun tumhaari ye shararat

nashad karoge tum agar shad karoge

tum ja to rahe ho magar itna to bata do

taqdir ke mare ko kabhi yaad karoge

tasir se KHali nahin 'bismil' ka taDapna

ye yaad rahe tum ko ki tum yaad karoge