ye bhi sun rakkhe har ek bin bajaane wala

ye bhī sun rakkhe har ik biin bajāne vaalā

ik farishta hai abhī āḳhirī aane vaalā

apne har zaḳhm ke chehre ko chhupā rakhtā hai

ghup añdheroñ meñ na.e chāñd ugāne vaalā

husn-e-mā’nī ke ujāle ko taras jaatā hai

dar-e-alfāz pe sar apnā jhukāne vaalā

ab koī baat nahīñ dil ko dukhāne vaalī

ab koī shaḳhs nahīñ ham ko satāne vaalā

jis taraf dekhiye ham ḳhud haiñ muqābil apne

ġhair koī bhī nahīñ sāmne aane vaalā

ham takalluf kā takalluf hī se dete haiñ javāb

hai sulūk apnā zamāne se zamāne vaalā

shajar-e-dil meñ hai mehmān ḳhizāñ kī sūrat

shāḳh-tā-shāḳh ka.ī phuul khilāne vaalā

sā'ateñ murda haiñ be-jān haiñ lamhe saare

kaun hai bār-e-mah-o-sāl uThāne vaalā

apnī āvāz kā chehra na gañvā de 'vasfī'

merī āvāz meñ āvāz milāne vaalā

ye bhi sun rakkhe har ek bin bajaane wala

ek farishta hai abhi aaKHiri aane wala

apne har zaKHm ke chehre ko chhupa rakhta hai

ghup andheron mein nae chand ugane wala

husn-e-ma’ni ke ujale ko taras jata hai

dar-e-alfaz pe sar apna jhukane wala

ab koi baat nahin dil ko dukhane wali

ab koi shaKHs nahin hum ko satane wala

jis taraf dekhiye hum KHud hain muqabil apne

ghair koi bhi nahin samne aane wala

hum takalluf ka takalluf hi se dete hain jawab

hai suluk apna zamane se zamane wala

shajar-e-dil mein hai mehman KHizan ki surat

shaKH-ta-shaKH kai phul khilane wala

sa'aten murda hain be-jaan hain lamhe sare

kaun hai bar-e-mah-o-sal uThane wala

apni aawaz ka chehra na ganwa de 'wasfi'

meri aawaz mein aawaz milane wala