ye bhuke log jis din ghar se saDkon par nikal aae

ye bhūke log jis din ghar se saḌkoñ par nikal aa.e

karoge kyā agar in be-paroñ ke par nikal aa.e

bahut hushiyār logo is na.ī tārīḳh ke hāthoñ

na jaane kab tumhārā ghar kisī kā ghar nikal aa.e

kahīñ ke phuul patte haiñ kahīñ ke phal kahīñ ke haiñ

ajab se peḌ ab bhārat kī dhartī par nikal aa.e

jahāñ sab bik rahā ho us jagah aisā bhī mumkin hai

mire hī qatl kā ilzām mere sar nikal aa.e

dar-e-taqdīs ko jab vā kiyā to qasr-e-hurmat se

batā.ūñ kis zabāñ se kitne saudāgar nikal aa.e

tumhārā aur tumhāre nazm kā us roz kyā hogā

kabhī sochā hai dīvāroñ meñ jis din dar nikal aa.e

'sa.ādat' aap is dīda-varoñ kī bhiiḌ meñ DhūñDeñ

bahut mumkin hai in meñ koī dīda-var nikal aa.e

ye bhuke log jis din ghar se saDkon par nikal aae

karoge kya agar in be-paron ke par nikal aae

bahut hushiyar logo is nai tariKH ke hathon

na jaane kab tumhaara ghar kisi ka ghar nikal aae

kahin ke phul patte hain kahin ke phal kahin ke hain

ajab se peD ab bhaarat ki dharti par nikal aae

jahan sab bik raha ho us jagah aisa bhi mumkin hai

mere hi qatl ka ilzam mere sar nikal aae

dar-e-taqdis ko jab wa kiya to qasr-e-hurmat se

bataun kis zaban se kitne saudagar nikal aae

tumhaara aur tumhaare nazm ka us roz kya hoga

kabhi socha hai diwaron mein jis din dar nikal aae

'saadat' aap is dida-waron ki bhiD mein DhunDen

bahut mumkin hai in mein koi dida-war nikal aae